Mark 7

Emahwapuni Tamana Najahajina

(Matiu 15:1-9)

1Parasi 'ee Sikuraipi ijihi pu'úmo ahuma Jerusaremi rena Jesuni roara. 2'Ejume Huni tisaiporu kivume ija paso'i kaivo hina 'iruma ijara. 3Parasi 'ee Jua mapoka emahwapuni tamana'omo pu ija so'avajiana kaivo paso'avajija 'iruma paijura. 4Pu vea ka'ene maketi rena roujaho pu 'iruma paijura kaivo ija somare'e iji'a ijura. 'Ene pu sahwapuni tamana ijí venare'e puni tevua some si'uara some 'ee kapusia some ijá vejura. 5Parasi 'ee Sikuraipiepo Jesu apome ijá 'wava Rakijihuna'e tisaipuruhuana ema tamapo vejuja'ina pavejure? Pu 'iruma i'i vejujaho ija paso'i kaivo maijura 'wavara. 6Hu eha vena ijá 'iama Ja niho'o ira'asima'ura Aisea nitama heha 'ahi ja rona ija'ina 'waramana. Aisea ijá 'iama

Ea kijahija iraru hohovura kaivo oja punijaho ani va'ura. 7Pu mairiji Na ta'arorihura kaivo pu Nuni tamana ura pave'i 'ahiura 'iamana.
8Pu vwihajujaho emaa puni tamanijaho Godoni tamana 'wa'i kaivo ijí ea najahura 'iamana. 9'Ene Hu pu pina ijá 'iama Ja Godoni tamanijaho ani rana'i kaivo joni tamanijino ea najahura. 10Mosisi nitama ijá 'iama Ohune'o omune'o puni hura veti'amana. Ea irara oahe'o omahe'o siripa'amajaho hu 'anaa kwa'amana 'iamana. 11'Enakaivo ja ani najaha ijá 'wava Ea pini unenu'u pina na'eje Godoni katua i'i kaivo omahe'o oahe'o pani'ajihareje mi'amajaho ja ijaho mamaa 'wahuna 'iavara. 12Ja ija'ina 'warava jihuna'e ja hu ruha pa'aremahu'e omahe'o oahe'o puni unenua 'aho'a pavenu. 13Ja ija'ina najahujaho Godoni ira 'uhu'i kaivo joni tamana ranavu. Uneunecha mapoka iviamaa ja vejuja'ina 'iamana.

Uneunecha Ka'ene Veju'e Emahuni Kara Siseranujina

(Matiu 15:10-20)

14Hu kú'o ea mapoka 'umenaume Huni rouma ijá 'iama Nuni vu'a hena vwiha'avara. 15Ea uneunecha samai rena vaji va'ujipo veju'e hu siserahuna pana kaivo huni vaji rena roa usevujara veju'e hu sisea renuna. 16Ea irara areri he'iro ve'amajaho ataa apúsa'amana 'iamana. 17Jesu eaka mapoka kajaho irechami'i kaivo sei vaji va'ume tisaiporuepo haa ijihuni maijaho apovara. 18Hu aporama ijá 'iama 'Ú ja 'u'o pahejo? 'Ú ja pahena pakavujaho ea uneunecha samai rena vaji va'ujipo veju'e hu siserahuna pane? 19Ijihuni maijaho 'iruma ijujaho oja vaja pava'una kaivo tei vaji va'una. 'Ena'omo túna'i va'e tiheju'e pa'arenuna. 'Enajihuna'e 'iruma mapoka niho'o mamaa 'iamana 20Hu ijá 'iama Irakijara emaapuni vaji rena roa usevujara veju'e hu sisea renuna. 21Ijihuni maijaho uneunecha mapoka sisea oja vaji navujihuna'e ijí sisea vwiha'eju'e oja 'urinau'ukamare'e napara turame 'asúra aheramone ea 'ania kwamasahe 22nesa apene ea pipuni uneunecha ki'eje ituname uneunecha sisea vene pisivie majikari karokaha vehuna vwihanune nia sisea kime jarika orahone ira'atiji namahe ira'ata vene jarika rene 'uraha ojura. 23'Ene ike mapoka sisea kaji oja vaji rena roa usevujara veju'e ea sisea rejura 'iamana.

Sairopinisia Naparijihuni Nimai Roijina

(Matiu 15:21-28)

24Jesu kwaa kajaho are'i kaivo Taia opuni kwai va'ana. Hu ijí va'e sei pini ajime Hu ura ea paka'avarono venana kaivo ijí tanuhuni 'unama pa'ana. 25'E'eme patetapa'a napara pipuni 'apaja 'u'ua 'avena sisei ajivi'ina'omo Jesu henarena Huni una'i mwe'i 'onana. 26Napara kajaho Jenitaru Sairopinisia ora. Hu jarima ijá 'wama Nuni 'apaja 'avena sisea ajivi'inakúne A 'avena sisea tasioma pi'onamaha 'wamana. 27'Ene Hu ijá 'wama Marako sesamai 'iruma vajihe pu ine tú'avara. Sesamaa puni 'iruma pwina 'eka va'e 'ua vajihuna niho'o areria pa'ana 'wamana. 28Napara kajara Hu eha vene ijá 'wama I'a. Natohwe 'Ua 'u'o teporu hara sesamaa puni 'iruma túa ijura 'wamana. 29Hu ijá 'wama A ijá 'warima jihuna'e oni 'apaja 'avena sisea ariha va'ana 'wamana. 30Napara kajaho huni sei va'i kavume 'apajaha 'avena sisea ka'ene ajimajaho ariha va'eme mamaa nenana.

Jesura Ataa 'Ee Ira Pa'ana'e Vejume Maranajina

31Jesu kú'o 'urine kwaa iha Taia are'i kaivo Saitani 'e'une va'e Karari Tikaparasi vaji va'ana. 32'Ejume ea 'ahopo ea ira hami pa'waravi'iniji'o ataa pa'areji'iniji'o aherame Jesuni va'ara. Pu 'ejahae ijá 'wava Oni ija huni húmata 'ahi ranama 'wavara. 33'Ejume Jesura ea mapoka kajija irechami'i kaivo ahema 'urina va'e ani hiji'i Huni ijijino ea kajihuni ataa vajijino ronu ronu irechame 'ee kú'o Huni cheriji 'ene ea kajihuni mitari 'ahi tanihana. 34'E'ika'i Hu nia akúpi 'ahi nirie siporua 'oji'i ijá 'wama Epata 'wamana. Epata ijihuni maijaho jara'usaha. 35'E'eme ni'aha kwino huni ataa mitara jaraume marajume ira hami 'waramana. 36'Ejume Hu ira kisina ijá 'iama Nara iraka ka'ene vejujaho ja ea pa'wara'avara. Hu 'waramajaho pu ira tuma'i kaivo kehi kehi 'waravara. 37Pu oja niho'o hwa'usaha'eme ijá 'wava Hu uneunecha mapoka mapoka hami ve paranu. 'Ene Hu ea ataa pa'ana venau'e vu'a hene 'ee ira pa'waravi'inijija venau'e ira 'waravu 'wavara.